Ethnologie
Än gschiide
ethnologemaa,
dä wott zu allne
völcher gaa,
wott d vielfalt vo
dä mönschheit gseh,
wott d unterschiid
zur känntnis neh.
Drum bsuecht är s
volch z Tasmania
und lehrt det, wie
mär fische cha.
Doch plötzlech
füült är sech ellei.
Drum telefoniert
är mit sim händy hei.
Da seit än Tasmanemaa:
„I wott au äs händy ha!“
Än gschiide
ethnologemaa,
dä reist beherzt
dur Afrika.
Är schtürchlet dur
dä dicht urwald,
macht schliesslech
bi Pygmäe halt,
gseht, wie die
fliissig sammle tönd
und wie s uf d
bäum ue chlädre chönd.
Beglückt schickt
är äs sms
i d heimet zrugg und chunt i schtress,
dänn da rüeft än urwaldfrau:
“Sonäs händy wott i au!“
Än gschiide
ethnologemaa
reist freudig bis
uf Kanada.
Im norde trifft är
Inuit,
trinkt läbertran
und bliibt so fit,
gseht, dass mer
mit harpune jagt,
doch sälber hät är
s nid ganz tscheggt.
Drum druckt är
lieber im kanu
am händy ume und
im nu
seit än alte Inuitmaa:
“I wott au äs händy ha!“
Än gschiide
ethnologemaa
reist frölich dur
Sibiria,
reist bis det, wo
s Ewenke hät,
är schlaft uf ämne
laubmoosbett,
gseht, wie mer
pilz und beeri isst.
Doch will in d
fründin sehr vermisst,
lüütet si im uf s
händy a
und seit än gruess
vo der mama.
Da rüeft luut än Ewenkefrau:
“Sonäs händy wot i au!“
Än gschiide
ethnologemaa
reist dur die
ganzi Sahara.
Är zältet, wo
Nomade sind
und sändelet mit
irne chind,
beobachtet uf
schritt und tritt,
au macht är än
kamelritt mit.
Är lüütet hei a
und verzellt
am händy, wienen
das uufschtellt.
Do rüeft än nomademaa:
„I wott au äs händy ha!“
Än gschiide
ethnologemaa
schtoot uf äm iis
z Antarktika,
wo s luuter
Königspinguin hät.
Wie isch das
schön, wie isch das nätt,
wie s iri junge
nie verlönd
und demokratisch
zämeschtönd!
Drum nimmt är s
händy schnäll i d hand,
macht fotos vo däm
chalte land.
Da rüeft schtolz än Pinguinfrau:
„Sonäs händy han i au!“