Pauli

Mir wüssed alles über d gschicht vo der sklaverei,

d unmönschlichkeit und die barbarei,

wo z Russland oder z Amerika

so mängem mönsch hät d hoffnig gna.

Im jahr achtzähhunderteinesächzg,

zuefällig isch äs s gliich jahr gsi,

händ beidi schtaate wohl d sklaverei

verbote, s hät gheisse: „Ihr sind alli frei.“

Leider isch bald grosse hass uufcho.

Dä hass hät allne die hoffnig vil z rasch wieder gno.

Mir händ ja alli über d zueschtänd uf sklavemärt

scho sehr vil gläse und au sehr vil ghört.

Mer händ öis über dä gringi wärt

vo sklavemönsche sehr empört.

Doch au wänn für öis die sklaveziit,

än schlimmi ziit, sehr wiit zrugg liit,

so simmer drüber guet informiert.

S isch alles hüt ganz genau dokumentiert.

„Onkel Toms hütte“ isch villne bekannt,

doch wär kännt d schtäge vom Pauli hüt i öisem land?

Under dä schtägetritt, det hät s äs holzbrättli gha.

Det hät mer s ässe im eifach hita.

Där Pauli hät immer ganz ellei

det gässe. Das isch keis dähei!

I där schtube sitzt d familie am tisch,

bi suppe, bohne, schpäck oder fisch.

Ganz sälte git s habermues für schind.

Das miechi ganz schtarch und sigi guet und gsund.

Suscht git s nur wasser und meischtens alts brot.

Där Pauli under där schtäge kännt nur eländ und not.

Är isch wie tuusigi vo chind än verdingbueb gsi,

im zwöite wältchrieg, sehr schwach und au chli.

Är isch als eltereloses chind,

wie all, wo mittellos gsi sind,

vo där zueschtändige bürgergmeind,

die hät s nid eifach nume guet gmeint,

als üsserscht billigi arbetschraft

pflägeltere zueteilt, dass äs sehr vil schafft.

Was dä bueb kännt hät, isch grossi not.

Und nienä hät s äs härz, wo für dä Pauli schloht.

Im tüüfschte winter hät där pflägvater där Pauli

zum holz go hole gschickt i d chelti.

Doch froschtbühle grad a beidne händ

händ s zuepacke verhinderet.

Där pflägvater isch druf usecho,

är hät vor wuet än holzschtange gno

und dadermit där föifjährig tödt:

än liich mit vil blaue fläcke übersät,

uf drizäh kilo abgmageret gsi,

das isch, was mer druf gfunde hät vom chline Pauli.

Was wüssed mir hüt über die vilä schicksal vo andere verdingchind,

wo minderjährigi schwiizer sklave gsi sind?