Am
sunntigmorge, hand in hand,
gaht gross
und chli gärn über land.
En lektion
in zoologie
söll
nämlech dä schpaziergang si.
Ganz stolz
erchlärt dä vater bald,
was kreucht
und fleucht i fäld und wald.
Der
allerbescht beobachtigsschtand
isch hützutags
dä schtrosserand.
Als erschts
chönt si än schpitzmuus gseh,
latinisch
heisst s Soricidae.
Mer schtaht
drum ganz vorsichtig schtill,
betrachtet
s weiche, churze fäll.
Insäktefrässer:
d schnauze schpitz,
doch ganz
uströchnet vo der hitz.
Lueg,
chind, pass guet uf und kapier:
En
schpitzmuus isch äs nützlechs tier.
Als
nächschts trifft mer än grasfrosch a,
än Rana
temporaria.
Im märz
leit s wiibli chlumpelaich
in fluss,
in weier und in teich.
Dä lurch
isch wächselwarm, schwanzlos
und liit
ganz flach da uf der schtross.
Lueg,
chind, pass guet uf und kapier:
En grasfrosch isch äs nützlechs tier.
Nur wenig
schritt, där nächschti halt:
En blindschliich liit uf äm asphalt.
Anguis
fragilis, oni gift.
Es
chrüchtier, wo mer sälte trifft.
Doch au bi
däm isch s so ne sach:
Das tier isch leider völlig flach.
Lueg,
chind, pass guet uf und kapier:
En
blindschliich isch äs nützlechs tier.
Dä
schtrosserand bütet no me:
En muulwurf
gsehnd s, än Talpidae.
Sin körper
hät en walzeform,
er jagt der
schnägg, der rägewurm.
Doch was
jetzt da am bode chläbt,
hät s
autorad nid überläbt.
Lueg,
chind, pass guet uf und kapier:
En muulwurf isch äs nützlechs tier.
Und vor dä
nächschte kurve singt
än amsle,
und das chind, das schpringt
grad uf dä
schwarzi vogel los.
En Four
wheel drive, rassig und gross,
chunt vo
der gägerichtig her.
Mit
uswiiche tuet er sech schwer.
Im
allerletschte augeblick
hät dasmal
nur dä vogel glück.